Изминатата недела следевме некои важни макроекономски најави и во САД и во Европа. Трендовите на двата континента се повеќе се разликуваат. Додека податоците во САД покажуваат дека нема да има рецесија во блиска иднина, европската економска перспектива останува многу попесимистичка.

Американските берзански индекси минатата недела повторно добија на вредност. За разлика од периодот веднаш по победата на Трамп, овој пат добивките беа пораспределени, при што акциите добија во повеќето сектори, а не само во оние што инвеститорите би ги поврзале со фаворизирање на претстојната американска администрација. Неизвесноста во однос на иднината на американската политика (особено во однос на геополитиката) не се намали изминатата недела; меѓутоа, во просек, компаниите со пониска пазарна капитализација добија повеќе од поголемите компании. Минатата недела имаше нешто помалку соопштенија за деловните резултати на американските компании, поради што уште повеќе се истакнаа резултатите на моментално најголемата компанија по пазарна капитализација Nvidia. Иако резултатите беа подобри од очекуваното, прогнозата за идниот раст донекаде ги разочара инвеститорите. Вредноста на акцијата не се промени значително на неделно ниво. Акциите на Alphabet изгубија бидејќи гласините дека американското Министерство за правда ќе го раздели Google стануваат се погласни.

На макроекономски план позитивно изненадување беше падот на бројот на нови баратели на работа, кој падна на најниско ниво во последните 7 месеци. Подобри од прогнозите се и податоците за продажбата на мало, која на месечно ниво порасна за 0,4% и продажбата на половни станови, која забележа годишен раст за прв пат по три години. Со очекуваниот континуиран економски раст, подобрување на пазарот на труд и стабилизирање на хипотекарните каматни стапки, се очекува натамошно зајакнување на американскиот пазар на недвижности. Американската централна банка (ФЕД) ги потврди очекувањата за натамошно намалување на каматните стапки врз основа на овие податоци. Сепак, во зависност од идните податоци за инфлацијата и пазарот на труд, можни се корекции во однос на динамиката на идните намалувања на каматните стапки. Неопходно е да се спомене и брзиот раст на курсот на доларот, кој споредено со еврото ја заврши неделата на највисоката точка од 2022 година, односно по курс од 1,04 долари за евро.

Во Европа, STOXX 600 ја заврши неделата со раст од околу 0,7%, додека повеќето други европски берзански индекси беа непроменети. За разлика од САД, макроекономските податоци покажуваат многу попесимистичка слика. Економската активност, мерена со индексот PMI, во ноември неочекувано бележи пад во однос на октомври. Така, PMI индексот на еврозоната изнесуваше 48,1, што укажува на контракција на економијата. Негативното изненадување беше главно Франција, каде што и производствениот и услужниот PMI заостанаа зад предвидувањата. И покрај релативно лошите податоци за економската активност, инфлацијата во еврозоната се чини дека е под контрола и во октомври изнесува 2% на годишна основа, што е во согласност со целите на Европската централна банка (ЕЦБ). Лошите макроекономски податоци и релативно ниската инфлација ја зголемуваат веројатноста за натамошно намалување на каматните стапки од страна на ЕЦБ, што ги спречи пазарите да се движат надолу. Од друга страна, притисокот врз инфлацијата е зголемен за релативно високиот  5,4% годишен раст на платите во еврозоната. Слична неизвесност во однос на идниот пат на монетарната политика има и во Обединетото Кралство, каде годишната инфлација изнесуваше 2,3%, највисока од април годинава.

Во Јапонија берзанскиот индекс Nikkei, изразен во евра, остана непроменет. Зголемената претпазливост е одговор на јапонските инвеститори на зголемените геополитички ризици и несигурноста за трговските политики на претстојната американска администрација. Банката на Јапонија најави подобрување на економските услови, а со тоа и малку повисоки инфлациски притисоци. Во Кина најважните берзански индекси загубија на вредност, главно поради недостигот на нови мерки за стимулирање на економската активност. Во Кина се вели дека властите чекаат појасна слика за политиката на идната американска администрација. На пример, берзанскиот индекс CSI 300 изгуби 1,6% од својата вредност. Позитивна вест е намалувањето на невработеноста кај младите во Кина, која се намалува втор месец по ред и изнесуваше 17,1%.